حاجه غريبه

هى فعلا حاجه غريبه

فقد لاحظت ان عددا ليس بالقليل من المدونين والمدونات

قد اصابهم احباط واكتئاب

طبعا كل له اسبابه ولكن ان يجتمع كل هذا العدد

فى توقيت واحد تقريبا هذا هو العجيب
هل شهر ابريل (وهو شهر تحول بين فصلين)
السبب ام ان هناك فيروس منتشر
فقد زرت العديد من المدونات ووجدت كميه من
الحزن ورفض الفرح او البهجه
انه شىء يحيرنى !!!!!
هل اصبحنا بهذا الضعف امام ضغوط الناس والمعيشه ؟
هل تنهار مقاومة الأنسان عند اية صعوبه يواجهها ؟
هل هذا اسلوب لجذب التعاطف ......؟
كنت افهم ان الكتابه او التدوين وسيله ممتازه لتفريغ
الشحنات الأنفعاليه لنعود بعدها لحالتنا الطبيعيه ।
ولكن وجدت بعض المدونيين استمروا على نهج الرفض الدائم للحياه
حتى ان احدهم كتب انه يفكر جديا فى انهاء حياته...!!!
او انه سيتوقف عن التدوين لأن حالته النفسيه سيئه !!
او ان المدون لا يجد ما يشعر به ليكتبه
وهكذا نجد ان مدونات ممتازه توقفت لشهور
ماذا جرى للمدونين .....؟
تكونش عين...؟!!!!
-------------------------------------
حاجه عجبتنى :
احد المدونين قام بعمل لينكات لمدونات اصحابها
توفاهم الله ، فشكرا له

عصفور ... عايده الأيوبي

ظهرت وبهرت ثم اختفت
لم تكن تسعى لشهره او مال
ولكنها فقط ارادت ان تغنى
-----
هى ابنه لأب مصرى وأم المانيه
خريجة الجامعه الأمريكيه بالقاهره
يقال انها توقفت عن الغناء لمرضها
ويقال ايضا انها توقفت لأن اسرتها
لا ترغب فى ذلك

مباركه من مصرى

الى الأخوه المسيحيين

مبارك الأعياد

وليكن هدفنا ان مصر لنا جميعا

يا طالع الشجرة - علي الحجار

الفنان على الحجار من القلائل اللذين اهتموا بما
يقدموه واحترموا عقل ووجدان المستمع
فتمتع بحب واحترام الناس له ولما يقدمه
يتمتع برؤيه واضحه فيما يقدمه من اغان
*على ايضا فنان تشكيلى متميز وله لوحات عديده
*على حافظ للقرآن الكريم وأعتمد فى عام 2005
كمقرىء للقرآن ومجود من الأزهر الشريف
*على الحجار سيحتفل بعيد ميلاده ال55 فى يوم 5 مايو القادم

يعنى أيه.....؟ !!!!!!!!!

قرأـت احدى قصائد العاميه والتى كتبها شاعر مصرى اسمه

عبد الحميد بدوى تعليقا على القبض على فتاتين بمحافظة كفر الشيخ

ثم اعقبه ايضا القبض على اكثر من عشرين شابا وشابه من النشطاء

السياسيين .

واعجبتنى تلك القصيد لعدة اسباب، منها انها تستعرض اغلب ما يحدث بمصر بأسلوب فكاهى مأساوى

وايضا تلك الصور الشعريه الجميله والمعبره الموجوده بالقصيده .

واليكم هذه القصيده التى اعتقد ان كاتبها من الأسكندريه لوجود بعض المفردات السكندريه.

-------

عملولك تاريخ كأنك مش بشر
ما انت اللى حاربت وانت اللى انتصر
وانت المهدى المهدى المنتظر
احنا اللى جينا قضاء وقدر
متشغلش نفسك بينا
يعنى اية شعب؟
يعنى شوية حجر
على شوية شجر ؟
تقدر تقول سيادتك
شوية بقر
احنا ياريس احنا حصانك
احنا مخلوقين عشانك
اوعى تفكر فينا ولا تشغل بالك
اغسل ايديك مننا
احنا ذنبا على جنبنا
احنا مين احنا
علشان تتكلم عننا
وكتر الف خيرك
اية يعنى لما تجيب جمال
واية يعنى لما تحبس العيال
واية يعنى لما تركبنا ونقول كمان
قال مش عجبهم المحاكم العسكرية
وبيطلبوا بالديمقرطية
طيب ما احنا شعب غشيم
واللى بيفهم فينا بهيم
ما انت ياريس صاحب الطلعتين
الطلعة الجوية والطلعة البهية
وفيها اية لما تعدل الدستور
وفيها اية لما يضيع عمرنا فى طابور
وفيها اية طب ما أى بنى ادام من الشعب
ان راح ولا جة طنبور
واية يعنى لما تسيطر على الجوامع والجامعات
واية يعنى انتخابات ومعدش فاضل كمان الا المحليات
واية يعنى لما تعاقب القضاة
معاك انت النجاة
واية يعنى صفر المنديال
واية يعنى حقوق انسان
واية يعنى لما تحبس الاخوان
واية يعنى لما تعين المعيد والعميد
طب ما الناس اسياد وعبيد
واية يعنى لما تكوينى بالحديد
دا حتى جسمناهيربرب ويزيد
واية يعنى لما تحبس الصحافين
مهما فى الاصل شوية كدابين
واية يعنى لما تعوص وش الشعب طين
واية يعنى لما تدفنا واحنا عايشين
واية يعنى تلفيق التهم واية يعنى معتقلين
واية يعنى لما فى المطار اول كلمة تنقال
المصريين على جنب
المصرى راح ولا جة ابن كلب
واية يعنى بلد بتتسرق
واية يعنى بلد بتتحرق
واية يعنىكام عمارة بتقع
واية يعنى كام الف مشروع فشل
واية يعنى لو الشعب انتحر
واية يعنى خطط خمسية
واية يعنى جامعة ويعنى اية ثانوية
ويعنى اية من الاساس تعليم
دا مهما يتعلم هيطلع بهيم
ربنا يخليك لمصر
انت رمز النصر
سيبك من المعارضين
وجرايد المستقلين
ولا اقولك ياريس حطهم فى الحبس
مين اللى قال ان احنا سبع تلاف سنة حضارة
طب فين الامارة
مين اللى قال ان احنا عندنا
هرم ونيل
انت ياريس انت الاول وانت الاخير
وفيها اية لما تلعب
جولف ولا اسكواش
طب ما الشعب بياكل ببلاش
شعب مقرف صحيح
شعب ما يختيشيش
قال اية عايز يعيش
وفيها اية لما نوصلوا الغاز لحد تل ابيب
لمدة عشرين سنة وزيادة
دا يوم الهنا
واية يعنى لما يبقى رخيص حبتين
كويس انهم رضوا هو احنا كنا نحلموا
ومعدش فاضل الا شوية الاعتصامات
والاضرابات وقال اية بيعملوا مظاهرات
دول شوية عيال خارجين عن القوانين
والبلد تمانين مليون ودول الف ولا الفين
شوية عيال زبالة
عايزين يعملوا فى البلد حالة
وان راحوا ولاجم حشرات
حكمتك يا ريس معاهم استحملتهم ساعات
وكتر خيرك
وفى الاول والاخر الكل يتمنى رضاك
ياريس اللى تحت ارضك
واللى فوق سماك
وكل الشعب يطلع ينزل
يعيش يموت بيهواك
واية يعنى لما يبقى مهندس
قاعد ببطتين فى السوق
واية يعنى لما يبقى مدرس
شغال على توك توك بيسوق
واية يعنى لما الشعب يأكل طوب
واية يعنى لما يبقى الشعب على امرة مغلوب

انت ياريس اللى طلعتنا من المنعطف للمنحنى
وعلى رايك كنا فين وبقينا فين
وكيف كنا وكيف اصبحنا
كنا قاعدين على المصطبة بنمصوا قصب
دلوقتى لسة قاعدين بس بنمصوا حطب

واية يعنى لما يبقى فية واحد عندة
كام الف فدان
وواحد تانى بيدور على قالب طوب
يحطة تحت راسة علشان ينام
واية يعنى لما يبقى فية كام مليون حكم قضائى
بضبط واحضار
يسبوهم ويحبسوا ناس تانية
معلهاش احكام
واية يعنى لما النصب زاد
واية يعنى لما ينتشر الفساد
بطول وعرض البلاد
واية يعنى لما يبقى الظلم عدل
والعدل ظلم
وقال بيقولوا ازاى المسئول ينام

ومعدش كمان اللى محدودين الدخل
ومعدومين الدخل واللى عايشين فى الوحل
واللى عايشين فى الترب
بيقولوا اتناشر مليون
انشالله يكونوا تلاتين
دول مش عايزين غير ضرب الصرم
ولاد الكلب ملوا البلد

واية يعنى لما يبقى فية اتنين مليون اطفال شوارع
طب وعاوزين الحكومة تعملهم اية
ولا توديهم فين
طب دول عارفوا طريقهم
انتم طريقكم فين
بتتكلموا وخلاص وكلامكم ملوش اساس
واقفين تعارضوا وقاعدين تعارضوا
وتلاقيكم كمان نايمين بالعرض
علشان لما تصحوا تعارضوا وخلاص
ما قلنا الف مرة كلامكم ملوش اساس
انا مش عارف معارضة دى ولا لحمة راس

وقال مش عجبهم الامن المركزى
ولا الامن القومى ولا البحث الجنائى
ولا الامن الغذائى ولا سجن المطار
امال هيمشى ازاى النظام
انت ياريس انت صاحب القرار
انت اللى تخلى الليل ليل والنهار نهار
انت النقطة المركزية فى الكرة الارضية
انت الاسد المغوار

واية يعنى لما يبقى عندنا كل كام شهر كام قتيل
على الحدود مع اسرائيل
طب ما دى طبيعة الحدود
مش المشكلة فى الاسرائيلين
المشكلة فى الناس اللى قاعدين على الحدود
ولا عايزين نعملوا زاى بتاع ايران وحزب الله
وكل شوية نقولوا
دولة اسرائيل ملهاش وجود
مش بينا معاهدات واتفاقيات
نموتوا احنا وهما يبنوا مستوطنات
واية يعنى لما المعبر يتقفل ويتفتح بامر من اسرائيل
انتم هبل امال عايزين الامر من مين
دا الحمد لله انهم سيبنا عايشين
وكفاية قوى انهم ما بيعملناش زى ما بيعاملوا الفلسطنين

واية يعنى امين شرطة
وفيها اية لما يضربك على قفاك
امال انت مفكر القفى معمول ليه
علشان ياخد مقاس ايدية
امال ايه
افهم يا بجم اعرف الحكاية ايه
اوعى مهما يبهدلك ولا يضربك
تتهبل وترد عليه

==

هذا ما خطه الشاعر الجميل الذى لا أعرفه

عبد الحميد بدوى